邱斐顯部落格: 2023

2023年3月28日星期二

作曲家柯芳隆，為「二二八事件」、「九二一大地震」譜出交響樂曲（邱斐顯 Podcast 第三集）

文／邱斐顯

（柯芳隆於邱斐顯的個人著作《想為台灣做一件事》發表會致詞，2010年11月6日。

照片攝影：謝慶龍。）

各位聽眾朋友，大家好。我是邱斐顯（Khu Huí- hián）。

這是邱斐顯Podcast 第三集。

（點入去下面的連結，收聽「邱斐顯 Podcast 第三集」。）

https://open.firstory.me/story/clfr13uxk00c101v3dw396tbm

今仔日，我欲介紹的人是，為「二二八事件」，譜出交響樂曲（ga̍k-khik）的作曲（tsok khik）家柯芳隆教授。

頂一集，我的Podcast節目內底，有介紹「推動台灣詩，行向國際」的詩人李魁賢。我有提到，李魁賢寫一首非常長的台灣歷史長詩《二二八安魂曲》。這首詩，後來譜成交響樂佮合唱曲。作曲者，就是今仔日我欲介紹的主題人物，作曲家柯芳隆教授。

今年3月初，柯芳隆教授有傳來予阮先生江蓋世一個消息，他的個人傳記（tuān-kì）出版矣（ah），他欲將冊寄予阮。

柯芳隆教授講，我2010年，共（kā）他採訪，寫一篇真詳細的報導，予他這兩年矣（ah），有考慮欲出版他個人的傳記。前兩禮拜，我收到柯芳隆教授的冊，我共阮先生江蓋世攏（lóng）非常歡喜，阮兩个（ê）人三更半暝就佇（tī）遐（hia）研究他的冊。

此嘛（tsit-má）是3月。我本來希望，會當將柯芳隆教授這一集的Podcast，趕佇（tī）2月底進前做好捒（sak）出來。毋過，我較頇顢（hân-bān），趕袂赴。

不過，發生佇1947年的「二二八事件」，本來就不是干焦（kan-na）發生佇2月28日一工的事件爾爾（niā-niā）。

佇遮，我欲借用詩人李魁賢佇《二二八安魂曲》的話頭，將二二八事件做一个（ê）簡單的背景說明。李魁賢的詩按呢（án-ni）寫：

晚頭仔，二月二十七，無風無雨，彼是一九四七年風雨亂紛紛的年代。

太平洋戰爭結束，在太平洋的島嶼台灣，主權換人，無共款文化體質互相衝激。

中國內亂和政治激烈變化，影響台灣，物價大起，社會不安，亂象愈來愈明顯。

二月二十七，晚頭仔，天馬茶房亭仔腳，台北市南京西路繁華的所在，查黑市的警察捒倒攤販（thuann-huàn）林江邁的菸攤仔，路邊的人議論紛紛，警員著驚，舉槍亂濺（tsuah），旁觀者僥倖著槍子（tshìng-tsí），群眾激動。第二日，全台灣齊震動，就按呢（án-ni）發生風雨狂狂滾的二二八事件。

這（tse）是詩人李魁賢的詩，《二二八安魂曲》的話頭。

二二八事件發生了後，三月初，從（uì）中國調來的軍隊，遐爾兵仔開始追殺台灣人，以後一路湠開（thuànn-khui）自北到南，足濟（tsiok tsuē）台灣的菁英份子、頭人、市民代表，甚至是一般民眾，不是予（hōo）拍，予（hōo）掠，予（hōo）關，予（hōo）刣，予（hōo）槍殺，就是失蹤，下落（hē-lo̍h）不明。

這（tsit）一年，全台灣，政治動亂、社會不安。台灣人民的日子，過甲（kah）非常的（--ê）驚惶（kiann-hiânn）。

針對「二二八事件」，台大歷史系的教授周婉窈，甚至佇她的面冊，寫講「三月做大水，是全島做大水，水是紅的。」

所以，我這（tsit）時來介紹，為「二二八事件」，譜出交響樂曲（ga̍k-khik）的作曲（tsok khik）家柯芳隆教授，並袂傷（siunn）晚。

誰人是柯芳隆？為什麼柯芳隆欲（beh）為「二二八事件」佮譜出交響樂佮合唱曲？

我上早（siōng tsá）對柯芳隆教授，為「二二八事件」，譜出交響樂曲（ga̍k-khik）有印象，是佇2008年4月初，師大音樂系的師生佮校友欲演奏佮演唱《二二八安魂曲》。

2008年，我佇中央通訊（thong-sìn）社，做網路（bāng-lōo）編輯的時陣，我捌（bat）用英文編輯這个（ê）《二二八安魂曲》音樂會的活動報導。因為這个（ê）編輯工作（kang-tsok）的需要，我主動佮這位作曲家柯芳隆教授連絡。

我心內有一屑屑仔（tsi̍t-sut-sut-á）好奇佮疑問。因為作曲家柯芳隆教授，彼當時是國立師範大學音樂系的系主任。一般來講，親像師範大學這款較保守的大學，哪會（ná ē）有教授，甚至是系主任，願意為詩人李魁賢所寫的《二二八安魂曲》這首詩，來譜曲？

我共這個疑問，囥（khǹg）佇心內。柯芳隆教授真歡喜我欲用英文來報導這个（ê）活動。柯教授甚至猶（iáu）毋捌我，就邀請我去參加這个（ê）音樂會。毋過，因為工作關係，我共柯教授說（suè）多謝，但是我無方便參加。

2010年，我佇雜誌寫專欄的時陣，想欲訪問柯芳隆教授，就透過我所熟識的曾道雄教授幫我問柯芳隆教授。彼時，柯芳隆教授已經無咧做系主任丫。

曾道雄教授寫email予（hōo）我，他佮我講，「柯芳隆教授做師大音樂系系主任的時，成立「表演藝術研究所」，以及後來的「音樂學院」。他是一位腳踏實地的作曲家，佮非常認真的好老師，他嘛捌得到吳三連文藝獎，他的作品－－啼哭的美人魚Crying Mermaid，除了藝術價值以外，嘛有環保意識，你會當共他訪問。」

我前後，共柯芳隆教授訪問兩擺。頭一擺訪問的時，他真客氣，並沒對我講他Kaddi較深入的觀點佮經驗，也就是講，他無提供較贅的資料，通好予（hōo）我寫。我問阮先生江蓋世講：「今嘛，欲按怎？我寫無什麼故事啦。」

他應我講：「那就是妳問的問題，不夠具體，嘛無直接。妳著（tō）愛（ài）較大膽去共（kā）問，才有可能得到較特別的答案。」

我甚至因為這个（ê）困擾，敲電話去請教詩人李魁賢。他共（kā）我講：「柯教授，他人真客氣，但是話無贅（tsuè），我對他嘛（mā）無啥了解。」

兩天後，我第二擺敲電話予柯芳隆教授。這擺，我提出較閣贅（tsuè）深入的問題去問他。他佮我講起，他的出世，他的家族，他小漢的生活，他按怎牽牛去吃草，他讀師專以後，按怎去學鋼琴，他讀大學以後，按怎去學創作樂曲。

他共（kā）我講他的豐富、閣（koh）精彩的生命故事，慢慢仔，我就知影我欲按怎去描寫他這个（ê）活靈靈的台灣作曲家。

原來，柯芳隆是1947年出世ê。In厝佇台中縣、大安鄉的南埔村。南埔村是大甲溪入海口的所在。雖然這是一个（ê）庄跤（tsng-kha）所在，但是仝款無法度避免受到「二二八事件」的影響。

柯芳隆共我講，他小漢的時陣，捌聽過厝內的序大人講起，他的阿舅本來佇鄉公所擔任課長，因為二二八事件，被逮捕，而且予人「灌屎」。這段悲慘的歷史，他不時記咧心肝頭。他希望自己會當用音樂創作，來記錄這段黑暗閣（koh）沉重的台灣歷史。他希望會當用這首安魂曲，來紀念為台灣勇敢犧牲的受難者。

柯芳隆教授本來想欲（beh）揣（tshuē）一首較適合的台語詩詞來譜曲，但是他揣（tshuē）真久，攏揣（tshuē）無。

二○○六年，拄好（tú-hó）詩人李魁賢將〈二二八安魂曲〉的詩寄予（hōo）他，柯芳隆歡喜甲，敢若（kánn-ná）拿（thê）到（tio̍h）寶貝物件。續落來，柯芳隆就用一年的時間，完成樂曲創作（tshòng-tsok）。

柯芳隆佇創作的時陣，為了會當閣（koh）較正確掌握李魁賢台語詩詞的音調，他特別拜託李魁賢用錄音的方式，大聲讀出這首〈二二八安魂曲〉，予他會當一直聽著（thiann-tio̍h）這首詩讀出來的聲音。

柯芳隆說：「李魁賢大聲讀〈二二八安魂曲〉的錄音檔案，這嘛（tsit-má）猶保留佇我的電腦頂頭。」

詩人李魁賢呵咾（o-ló）柯芳隆，講：「〈二二八安魂曲〉總共有六個樂章，兩百二十八行的歷史長詩，柯芳隆都會當按照時間、按照章節，共（kā）伊完成譜曲，而且彼陣他閣（koh）是師大音樂系的系主任，有無閒袂了的學校行政工作（khang-khuè）愛處理。他真正是一位非常認真的作曲家。」

〈二二八安魂曲〉是台語詩詞佮（kap）管弦樂的大型創作，不但有管弦樂器的合奏，閣（koh）有合唱團加入合唱。〈二二八安魂曲〉完成的時陣，柯芳隆六十歲。嘛是「二二八事件」六十週年的紀念。

這，就是為什麼一咧國立師範大學音樂系的系主任柯芳隆，欲創作〈二二八安魂曲〉上大的原因。

－－－－－－－

2023年，二月初六，Türkiye佮Sūriyā相黏（sio-liâm）的地帶，發生非常大的地動。死亡的人數，超過五萬七千偌（guā）人。這是Türkiye 100偌（guā）年來死亡人數最多的地動。

這（tse），予（hōo）咱想起24年前，西元1999年9月21日，台灣拄著世紀大地動－「921大地動」，整個台灣，天災佮（kap）人禍，予（hōo）足（tsiok）贅（tsuè）人（lâng）家破人亡。

兩千偌（guā）人當場因為地動來過身，一萬偌（guā）人受傷，五萬偌（guā）間的厝全部予地動晃（hián）倒去，另外五萬偌（guā）間的厝倒一半。真贅人不但Kaddi的親人、朋友過身，而且，連Kaddi住的所在攏無去矣。

這咧大地動，予（hōo）台灣人民悲傷過日子。柯芳隆決定欲用音樂創作，來表達他對這塊士地的愛，佮（kap）疼心。因此，他創作大型管弦樂與合唱的交響曲作品－－《2000年之夢》。他甚至事先邀請台語詩人林央敏，為這咧合唱曲來寫詩。

這首《2000年之夢》，自從發表以來，包括島內和海外，已經演出十幾擺，每一擺攏動員兩三百人參與演出，這首予人聽著會振作的交響曲，真贅聽眾聽了（liáu），攏真感動。

有關我訪問柯芳隆教授的文章，我會佇這集的Podcast下面，囥（khǹg）相關的連結。

非常感謝各位今仔日的收聽。再會。

牧童作曲家柯芳隆的《二二八安魂曲》

文／邱斐顯

https://felicitychiu.blogspot.com/2010/08/blog-post.html

228 Requiem 二二八安魂曲 YouTube連結網站：

https://www.youtube.com/watch?v=cyWn9X92EOc

邱斐顯訪談心情燒錄（40）／熱情／四、作曲編曲，靦腆木訥

https://felicitychiu.blogspot.com/2015/06/40.html

2023年2月13日星期一

詩人李魁賢，推動台灣詩，行向國際！（邱斐顯 Podcast 第二集）

文／邱斐顯

（李魁賢於邱斐顯的個人著作《想為台灣做一件事》發表會致詞，2010年11月6日。

照片攝影：謝慶龍。）

各位聽眾朋友，大家好。我是邱斐顯。

這是邱斐顯 Podcast 第二集。

（點入去下面的連結，收聽「邱斐顯 Podcast 第二集」。）

https://open.firstory.me/story/cldt2hj7m0y1401tj34hm7lzd

今仔日，我欲介紹的人是：

詩人李魁賢，推動（thui-tōng）台灣詩，行（kiânn）向國際。

今仔日的節目，我分做三个（ê）部分來介紹：

第一（ê）部分，誰人是李魁賢？

第二（ê）部分，李魁賢，他寫過什麼款的詩？

第三（ê）部分，為什麼李魁賢欲（beh）

推動（thui-tōng）台灣詩，行（kiânn）向國際？

第一（ê）部分，誰人是李魁賢？

李魁賢，是台灣有名的詩人。

他佇台灣本土，寫詩－－

關心台灣人、台灣事，台灣歷史，佮台灣文化。

李魁賢，嘛是（mā sī）國際有名的詩人。

他，有能力將家己的作品，翻譯做（tsò）英文；

而且他嘛（mā）有能力將外國詩人的作品，翻譯做（tsò）中文。

李魁賢，他不但用詩，佮（kah）國際詩人交流，

他甚至盡全力，推動台灣詩，行向國際。

李魁賢，今年85歲。他從（uì）1953年，17歲開始寫詩，到2023年，他寫詩的歷史，就滿70年囉！一個詩人，堅持他寫詩的熱情，將近70年，這就非常值得咱尊敬佮欽佩。

李魁賢將近70年寫詩的過程當中，得獎不計其數。你只要佇網路（bāng-lōo）頂頭，Google揣一下李魁賢，或者用Wikipedia查李魁賢，我保證，你會看tioh一拖拉庫的資料，他不但得到真濟（tsin tsē）台灣的獎項（tsióng-hāng），嘛（mā）得到真濟（tsin tsē）外國的獎項。

李魁賢，是真少數會曉真濟種外文能力的台灣詩人。所以，他會當盡全力推動（thui-tōng）台灣詩行（kiânn）向國際。而且，帶領（tuà-niá）一寡比他較（khah）少年的詩人，做陣打拼。他，甚至希望會當提升「台灣」與「台灣詩」的國際地位。

李魁賢，1937年出世佇（tī）台北淡水，彼當陣，台灣是咧（teh）日本統治的階段。他讀小學的時陣，有讀著（tio̍h）兩年的日本教育。但是不外久，二次世界大戰就（tō）結束。日本戰敗，他的日文教育嘛就（mā tioh）到此為止（kàu tsia uî-tsí）。

後來，中華民國的國民黨政府，徙（suá）來台灣，台灣的教育，全面從（uì）日本教育，改做「講北京語的中文教育」。真濟（tsin tsē）日本時代台灣籍的教師，只好從（uì）「教日語」，改做「教北京語」。

遮e老師為tio̍h「教冊的飯碗」，姑不而將（koo-put-lî-tsiong）互中華民國政府強逼去學北京語。遮e老師，in的「北京語」，定定是前一工（tsîng tsi̍t kang）晚時才學e，第二天透早著（tio̍h）愛用「北京語」教學生。李魁賢佇小學三年以後，就（tō）感覺家己（ka-kī）的「中文」學kah離離落落。

一直到kàu初中三年，李魁賢的「中文」，才認真學兩年爾爾（niā-niā）。彼陣，他真愛讀《開明少年》，毋過他的中文語（gí）詞（sû）無夠，表達能力毋（bô）好，寫作文的時陣，真傷腦筋。

他講，家己（ka-kī）想欲寫作，但是中文的底無好，所以改做寫詩，而且，詩的語（gí）句（kù）較短，著（tio̍h）會當表達意思，閣（koh）毋免受到古文「語（gí）法結構」的限制。

李魁賢17歲的時陣，頭一擺投稿，他的頭一首詩〈櫻花〉，就順利發表佇《野風》文藝雜誌頂頭。

因為寫的詩有發表，李魁賢受到鼓勵，就繼續寫詩。你可能以為他是讀文學的，或者是讀語（gí）文的。但是，李魁賢讀的是－－台北工業專科學校。（就是台北工專）。這咧學校，此嘛的名稱是國立台北科技大學。佮其他的台灣詩人比起來，李魁賢學的是較特殊的化學工程，他算是少數「理工科畢業」的詩人。

數十年落來（lo̍h-lâi），李魁賢所寫的詩，除了佇（tī）台灣發表以外，嘛（mā）捌（bat）佇（tī）中國、美國、菲律賓、香港，有各種語文的翻譯本。而且，他的詩，嘛（mā）捌（bat）佇（tī）日本、韓國、加拿大、紐西蘭、荷蘭、南斯拉夫、羅馬尼亞、印度、希臘、西班牙，這些（遮的tsia--ê）國家的文學雜誌佮詩刊頂頭發表。

雖然按呢，毋過（m̄-koh），你敢kám知影（chai-iáⁿ），李魁賢的老父，並無支持他的寫作。

13年前，2009年，我訪問詩人李魁賢，他按呢（An-ne）共我講（kā guá kóng）：「我的詩發表在雜誌頂頭，雜誌寄到我家去，我老父接到了後，就把它收起來，藏在屜仔（thuah-á）底，毋（m̄）互我知影。有一次，我無意中打開屜仔（thuah-á）才發現。以後，每一擺有冊或者是雜誌寄來，我老父攏毋（m̄）講，我嘛惦惦無欲問，因為他無甲意我寫詩投稿。」

當初in老父反對，沒想到（kàu）後來，數十年落下來，詩的創作與翻譯，煞（suah）變成李魁賢生命中非常重要的一部份。

他的詩時常發表，in厝內，定定收到發表的通知佮雜誌，久來，連郵差攏知影（lóng tsai-iánn）他的姓名和住址。李魁賢講，「我讀工專的朋友要寄批互我，不知道我淡水的確實地址，干焦（kan-na）佇批囊（phue-lông）頂頭，寫一咧『淡水李魁賢』，結果，郵差著（tio̍h）真正將批送到阮兜來。」

頂chit 遍，我訪問詩人李魁賢，是2009年。這是13年前的代誌囉。

李魁賢捌（bat）做過國家文化藝術基金會的董事長。2007年底，他拄卸任。彼陣，他已經七十歲矣。但是，人講，人生七十才開始。2008年，李魁賢有in查某囝的協助，他開始學習使用電腦。

他不但學會曉用注音符號（hû-hō）輸入中文，嘛（mā）學會曉用Skype通訊（thong-sìn）軟體，佮（kah）住tī國外的查某囝連繫。若拄到電腦頂頭他毋捌的問題，他long會叫他的查某囝教他。

李魁賢學會曉使用電腦了後，他沓沓仔（ta̍uh-ta̍uh-á）將家己過去數十年來所寫的作品，一千外首的詩，一篇一篇打字，一篇一篇囥佇他個人的BLOG「名流（tsu-pâng）書房」頂頭。他嘛（mā）利用電腦整理他個人佮家族仔的歷史佮故事。

2009年，我採訪他的時陣，他講，他的BLOG內底有1034首的詩。

為tioh這擺Podcast的節目，我最近閣（koh）佮他請教，這（tsit）十二、三年來，是不是有增加較濟（khah tsē）的資料。他講，BLOG內底的詩，此嘛（tsit-má）是1265首詩。比過去，增加231首。

第二（ê）部分，李魁賢，他寫過什麼款的詩？

頭前，我有講過，李魁賢是台灣有名的詩人。他佇台灣本土，寫詩－－「關心台灣人、台灣事，台灣歷史，佮台灣文化」。

因為他的詩真濟，我無beh佇遮詳細講，我會將李魁賢名流書房BLOG的連結囥佇這一集Podcast下面。

李魁賢的詩，一向攏是關懷社會、關懷弱勢，針對台灣歷史悲劇「二二八事件」，他寫出一首，兩百二十八行（tsuā）的歷史長詩〈二二八安魂曲〉。這首詩的創作，先用華語發表，後來才用台語發表。這首詩的創作時間真長，經過幾若年才完成。

台語版的〈二二八安魂曲〉，2006年2月28日發表於《台灣日報》，全首詩攏總有六章，兩百二十八行（tsuā）。後來，師大音樂系的系主任柯芳隆教授，將〈二二八安魂曲〉譜成交響樂與合唱曲。2008年4月7日，在師大音樂系，老師、學生，佮畢業的音樂系系友聯合演奏、合唱之下，佇國家音樂廳舉行頭一擺演出。彼當陣，71歲的詩人，李魁賢本人，就站佇舞台頂，配合音樂佮節奏，大聲讀toih他家己所寫的詩。

李魁賢，是真少數會曉真濟種外文能力的台灣詩人。

他小學的時陣，接受過兩年的日本教育，會曉一屑屑仔（tsi̍t-sut-sut-á）日語。等到他二十外歲，出社會、吃頭路，他閣（koh）利用下班以後的時間，家己去進修三種語言。

一九六○年代，佇台灣，欲學習外國語言的環境無啥好，毋過，李魁賢總是盡量把握任何機會，不斷充實他家己的外國語言能力。

1961年，他日時，佇台灣肥料公司，做主管；晚時，他到台灣大學夜間補習班進修語言課程。一禮拜有三工晚時，著愛上課，他分別學的是：英文翻譯、基礎德文、佮日語對談，這（tsit）三種無仝款的語言。

1961年，李魁賢就開始將英文小說，翻譯做中文。1963年，他考進入去教育部歐洲語文中心德文科的高級班。1964年，他有考肇（ū- khó- tiâu）公費獎學金，本來有機會會當出國留學，但是後來毋知是啥什麼原因，獎學金煞予（hōo）取消。

1967年，李魁賢30歲。他予（hōo）台灣肥料公司／／派去瑞士（sūi-se）工作（kang-tsok）三個月。李魁賢彼時非常欣賞德國詩人李如啟（北京語是里爾克），他認為他家己是一咧「執迷不悟的李如啟迷」，彼（hit）三個月的薪水，他差不多攏提去買李如啟所寫的冊。1972年，他接受邀請，參加設佇瑞士（sūi-se）e「李如啟學會」，做一咧會員。

毋但（m̄-nā）按呢，從1966年至2001年的三十外年之間，他一直 leh翻譯李如啟所寫的詩。佇台灣，若欲講到翻譯李如啟作品尚濟的人，彼（he）咧人，就是詩人李魁賢。

除了用中文翻譯真濟（tsin tsē）李如啟的詩，李魁賢嘛（mā）佇1999年，用台語文字，翻譯英國大文學家William Shakespeare的戲劇作品《暴風雨》。這本冊，是由桂冠出版社所出版e。李魁賢所翻譯的台語版《暴風雨》，以前無這款的例，從（uì）英語翻譯做台語，這是歷史上的頭一擺。

第三（ê）部分，為什麼李魁賢欲beh推動（thui-tōng）台灣詩行（kiânn）向國際？

一九七○年代，李魁賢就開始參加世界詩人大會（tāi-huē）。

1973年，世界詩人大會（tāi-huē）佇台北市的（ê）圓山仔大飯店舉辦第二屆的時陣，李魁賢有參加。他頭一擺佮印度詩壇領袖，而且是世界詩人大會（tāi-huē）創辦人之一的施里尼華斯（Srinvias）博士熟識。

三年後，1976年，世界詩人大會（tāi-huē）佇美國舉辦第三屆。這（tse）嘛（mā）是美國為著慶祝．建國200年所舉辦的活動之一。

李魁賢佮施里尼華斯（Srinvias）博士他們（in）兩个人攏閣去美國參加第三屆e世界詩人大會（tāi-huē）。

施里尼華斯博士（Srinvias），主動共（kā）李魁賢講，「咱三年前佇台北見過，我對你有印象。」這位印度詩人是前輩，他1912年出世，他的年紀閣比李魁賢大25歲。從（uì）這以後的三十外年，他們一直互相寫批，保持連絡。

1995年，李魁賢擔任台灣筆會的會長。彼一年，台灣筆會舉辦亞洲詩人會議日月潭大會（tāi-huē），為著籌備這咧活動，台灣筆會會長李魁賢就擔任這咧大會（tāi-huē）的秘書長，他有邀請一位印度詩人來參加。

這咧詩人無法度來台灣，後來，他反倒轉邀請李魁賢，將詩寄去印度，互他刊佇雜誌頂頭，他嘛（mā）向另外一位編輯推薦李魁賢的詩。李魁賢甚至得到西元2000年印度的詩人獎。

因為按呢，李魁賢開始積極投入詩的國際交流活動，希望會當推動（thui-tōng）台灣詩行（kiânn）向國際。

嘛（mā）因為李魁賢共印度的特殊緣份，印度詩壇有三年（2001年、2003年，佮2006年）提名他，去爭取諾貝爾（のべる）的文學獎。

2005年1月開始，李魁賢接任國家文化基金會董事長。兩個月後，李魁賢就籌備高雄的世界詩歌節，邀請15國32位詩人，以及61位台灣詩人參加。

2005年7月，李魁賢用他家己的私人費用，支持蒙古佇烏蘭巴托，舉辦第一屆台灣蒙古詩歌節，他彼陣有招一寡台灣詩人，組團同齊去參加。

佇國家文化基金會董事長的任期內底，李魁賢總共舉辦兩擺台灣蒙古詩歌節。第二擺是2007年，他邀請13位蒙古詩人來台灣參加。

李魁賢，世界行透透，就是希望台灣人所寫的詩，會當予其他國家的人看會到。李魁賢認為，他從事國際詩交流活動，心肝頭尚重要的想法是，按怎表現出台灣詩的整體意象，不是以他個人的表現為滿足，所以，他攏會盡量招（tsio）其他詩人做夥參加。

現在，全世界最大的詩人團體，它的名稱，號做「世界詩人運動組織」，這是由一位南美洲、智利Chile的詩人，路易．阿里亞斯．曼佐（Luis Arias Manzo）佇2005年10月所創辦。會員涵蓋五大洲和阿拉伯世界，總部設在智利聖地牙哥，有將近130國、超過9,200 ê詩人參加。這是迄今（kàu-taⁿ）為止、全世界最大的詩人團體。

李魁賢，是世界詩人運動組織亞洲副會長。這咧亞洲副會長的職務，他為（uì）2014年就開始做，一直到今嘛。

2015年，李魁賢開始策畫「台南福爾摩莎國際詩歌節」。他邀請11國、20位外國詩人來台灣參加。

2016年起，一直到2019年，福爾摩莎國際詩歌節，攏佇淡水舉辦。

淡水，是李魁賢的家鄉。淡水，不但是台灣北部的港口，嘛是台灣最早與海外交流通航的港口。數百年來，蹛（tuà）佇淡水的族群非常濟，有平埔族、河洛、客人、西班牙人、荷蘭人、日本人。多元的族群文化，予淡水晟做一個真有特色的所在。因為按呢，閣較（koh-khah）會當吸引外國詩人來到台灣。

2020年，福爾摩莎國際詩歌節的活動，因為COVID-19疫情嚴重的緣故，就無邀請外國詩人來台灣，不過，國際詩歌節的活動，改做線頂會議，猶原有8位外國詩人佇線頂參與。

2021年佮2022年，因為全球亦閣佇COVID-19疫情之下，咱福爾摩莎國際詩歌節的活動，為（uì）過去的國際推廣，改做台灣本土詩人佮社區文化、大學校園的深入結合，淡水在地團體，譬如講淡水文化基金會，以及淡水忠寮社區發展協會，正咧打拼推廣淡水是世界文化城市的概念，希望有一工，會當向聯合國教科文組織申請成功。

為（uì）寫詩、譯詩，到推動國際詩歌節的活動，詩人李魁賢是一位非常重要的推手，他就是希望會當將台灣推捒（the-sak）去世界各國，不論是用詩，或者是用文化、用城市e名，予台灣揚名國際。

李魁賢堅持他的理念，一生奮鬥數十年，佮世界詩人交流，參與世界詩人運動。而且他認真打拼，為著推動台灣詩，行向國際，他不但招台灣詩人鬥陣（tàu-tīn），行出國外、拍開眼界，他嘛（mā）邀請外國詩人來台灣，參與國際詩歌節的活動，才會當予其他國家的詩人，看會到台灣詩人的表現，以及台灣文化的精彩。

下面，我欲講的是，我佮詩人李魁賢的緣份。

講起來，我佮詩人李魁賢有一咧真特殊的緣份。

2008年，我在中央通訊（thong-sìn）社，做網路（bāng-lōo）編輯的時陣，我捌（bat）用英文編輯一个（ê）音樂會的活動報導。這个（ê）音樂會的主題，號做（hō-tsò）「台灣新聲：二二八安魂曲」。因為這个（ê）編輯工作（kang-tsok）的需要，我主動佮這首詩的作者，詩人李魁賢連絡。彼陣，我尊稱他做（tsò）李魁賢老師（lāu-su）。

2009年，我離開中央社，恢復我家己寫作的工作（khang-khuè）。

彼一年个（ê）中秋節前一工，我當咧揣我家己个（ê）家族資料，揣我的外祖的名。我講的外祖，是阮爸爸的外公。結果佇網路（bāng-lōo）頂頭，我看到詩人李魁賢接受訪問的文章，提到他外公的名字，竟然佮我的外祖仝名，而且他所寫的長輩，嘛是我所知影的長輩。

2009年中秋節彼工，我敲電話互（hōo）李魁賢老師（lāu-su），我佮他講，「你的外公，是我的外祖，他是阮爸爸的外公。」李魁賢老師（lāu-su）聽著（thiann-tio̍h）了後， kā 我講真濟家族仔內底的親情（tshin-tsiânn），他真意外，嘛（mā）真歡喜。我嘛（mā）仝款。論輩份，他比阮爸爸較（khah）少歲，我著（tio̍h）愛叫他阿叔。